TUME HURU YA TAIFA YA UCHAGUZI YATOA MAFUNZO KWA MAKARANI WAONGOZAJI WAPIGA KURA WA VITUO JIMBO LA MUHAMBWE

Posted on: October 25th, 2025

Msimamizi wa Uchaguzi Jimbo la Muhambwe Halmashauri ya Wilaya ya Kibondo, Ndg. Daudi Mapunda, amefungua rasmi zoezi la mafunzo kwa makarani wa usimamizi wa vituo vya kupigia kura Leo 25.10.2025 likiwa ni maandalizi kuelekea uchaguzi mkuu wa mwaka 2025.

Mafunzo hayo yanayofanyika katika kumbi mbalimbali Wilayani Kibondo yameanza leo na kutarajiwa kumalizika tarehe 27 Oktoba 2025. Mafunzo hayo yanawahusisha makarani waongoza wapiga kura, ambapo wanajifunza kwa vitendo namna ya kujaza fomu namba 6 na fomu namba 7 pamoja na kutimiza viapo vyao vya kazi.

Akizungumza wakati wa ufunguzi, Ndg. Mapunda amewataka makarani hao kufuata kwa umakini maelekezo watakayopatiwa katika mafunzo hayo, kuzingatia wajibu wao, na kuhakikisha wanatoa kipaumbele kwa watu wenye uhitaji maalumu kama wajawazito, wazee na watu wenye ulemavu.

Aidha, amewasisitiza kufuata taratibu za kanuni za uchaguzi wa Rais, Wabunge na Madiwani za mwaka 2025, zinazohusu usahihi wa kujaza fomu husika.

Kwa upande wake, Msimamizi wa Mafunzo katika kituo cha FDC Kibondo, Ndg. CPA Sospeter M. Makene, amewataka makarani kutambua majukumu yao ikiwa ni pamoja na kuwaelekeza wapiga kura watakaoshindwa kutambua vituo vyao walivyopangiwa.

Katika mafunzo hayo, makarani walipata nafasi ya kufanya mazoezi ya upigaji kura kwa vitendo, hatua iliyowasaidia kuelewa kwa undani majukumu yao siku ya uchaguzi pamoja na kuuliza maswali mbalimbali kuhusu utekelezaji wa majukumu yao.

Mafunzo hayo yanafanyika ili kuhakikisha Uchaguzi Mkuu wa Mwaka 2025 unafanyika kwa Amani, Uwazi na Usawa.