MKUU WA WILAYA YA KIBONDO ATOA HAKIKISHO LA USALAMA SIKU YA KUPIGA KURA

Posted on: October 23rd, 2025

Mkuu wa Wilaya ya Kibondo, Mhe. Kanali (Mstf) Aggrey J. Magwaza, amewahakikishia viongozi wa dini wilayani humo kuwa wasiwe na hofu kuhusu siku ya uchaguzi, akisisitiza kuwa uchaguzi utafanyika katika mazingira ya amani na usalama wa kutosha.

Akizungumza tarehe 22 Oktoba 2025 katika kikao kilichofanyika katika ukumbi wa Ofisi ya Mkuu wa Wilaya, Mhe. Magwaza aliwataka viongozi wa dini kuwaelimisha waumini wao kuendelea na shughuli zao kwa utulivu, kwani vyombo vya ulinzi na usalama vimeimarishwa kikamilifu kuhakikisha hali ya amani inadumu kabla, wakati na baada ya uchaguzi.

Kwa upande wake, Kamanda wa Polisi wa Wilaya ya Kibondo aliwahimiza viongozi wa dini kuendelea kuwalinda waumini kiroho na kushirikiana na jeshi la polisi katika kulinda usalama wa raia na mali zao.

Aidha, viongozi wa dini walitoa ushauri kwa serikali kuendelea kuwashirikisha katika shughuli mbalimbali za maendeleo ya jamii, wakisisitiza kuwa ushirikiano kati ya serikali na taasisi za dini ni muhimu katika kujenga taifa lenye umoja, amani na ustawi.