MAZINGIRA YETU AFYA YETU

Posted on: June 5th, 2025

Katika kuadhimisha siku ya mazingira Duniani, Wilayani Kibondo wananchi, watumishi Pamoja na wanafunzi wa chuo cha utabibu na wauguzi walijitokeza katika kufanya shughuli za usafi eneo la Hospitali ya Wilaya.

Akiongoza zoezi la usafi huo Bwana Shekarata Bakari Omary ambaye ni Mwakilishi wa Mhe: Mkuu wa Wilaya ya Kibondo amewapongeza watumishi wote Pamoja na wananchi waliojitokeza katika kilele cha maadhimisho ya siku ya mazingira Duniani kwa kufanya usafi maeneo ya Hospitalini hapo.

‘’kwa siku ya leo watumishi wilaya ya kibondo kushirikiana na Mganga Mfawidhi wa Hospitali yetu tumejikita zaidi katika kufanya usafi maeneo ya hospitali ili mazingira yaendelee kua rafiki kwani tunaamini mtu anapokuja hospital kwa ajili ya huduma za afya na kukuta mazingira ni salama huweza kumpa haueni’’ Aliongea Bwana Shekarata.

Vilevile ameelezea juhudi zinazotekelezwa na Serikali katika shughuli za mazingira ikiwa ni moja ya mambo endelevu yaliojumuishwa katika ilani ya chama tawala iliyozinduliwa siku za hivi karibuni hivyo amewasisitiza wananchi kuendelea kufanya shughuli za utunzaji mazingira kwani mazingira pia ndio yanayosaidia kutunza watu katika shughuli zao za kila siku.

Nae Mganga Mfawidhi Daktari Cornely Nibiki amewashukuru wananchi na watumishi wote katika wilaya ya kibondo kwa kujitokeza kufanya usafi Hospitalini hapo na kutoa wito kwa jamii kuendelea kushirikiana na Hospital ya Wilaya katika shughuli za kuboresha mazingira kwani uboreshaji mazingira pia huweza kuimarisha afya katika jamii.