WAZAZI KUHIMIZWA KUTETEA NA KULINDA MASLAHI MAPANA YA MTOTO

Posted on: June 19th, 2025

Mkuu wa Wilaya ya Kibondo Mhe: Aggrey John Magwaza amewakumbusha wazazi kuwa na usimamizi mzuri wa maslahi ya Watoto ili kuendelea kuzilinda haki zao.

Mhe: Magwaza ameyasema hayo katika sherehe za maadhimisho ya kilele cha siku ya Mtoto wa Afrika 2025 yaliofanyika kiwilaya kata ya Murungu Kijiji cha Kumuhasha viwanja vya Shule ya Msingi Nyavyumbu.

“Watoto wanatakiwa wapewe ulinzi, walale mahali pazuri, wakati wote mzazi au mlezi ujue mtoto wako yuko wapi, anacheza na akina nani, muepushe na watu wenye nia mbaya” alieleza Mkuu wa Wilaya.

Vilevile amesisitiza wazazi pamoja na walezi kutumia vyombo vya Serikali ikijumuisha madawati ya ulinzi wa mtoto endapo watakapokumbwa na matatizo yahusuyo haki zao.

Pamoja na hayo ameelezea namna Serikali ilivyoimarisha hali ya upatikanaji wa elimu kwa Watoto kwa kupunguza umbali ambapo mtoto anaweza kupata elimu karibu na mazingira anayoishi ikiwa ni pamoja na kuanzishwa kwa shule shikizi ili Watoto wenye umri mdogo waweze kufikiwa kwa ukaribu, na shule zilizokuwa na msongamano Serikali imeongeza madarasa mfano shule ya msingi Kumuhasha Iliyoongezewa madarasa kwa ajili ya kupunguza msongamano wa wanafunzi na kwingine imelazimika kujenga shule mpya.

Aidha amewataka wazazi kuwa karibu na Watoto kwa kuwaruhusu kuwa na nafasi ya kutoa maoni katika mambo ambayo yanawahusu kwani wakiwaweka karibu nao huwasaidia kuondoa hofu na watakua tayari kuongea mambo yanayowahusu na wanayoyapitia mfano changamoto za ukatili kwa Watoto.

Nae Afisa ustawi wa jamii Bwn: Magubiki Masebya amewakumbusha wanajamii kuzingatia maslahi mapana ya Mtoto na kuhakikisha haki zao za msingi zinatekelezwa kwa vitendo ikijumuisha Haki ya kuishi, Haki ya Kuendelezwa, Haki ya kutobaguliwa ,Haki ya kulindwa  na Haki ya kushiriki kutoa maoni katika mambo yanayowahusu.

Siku ya Mtoto wa Afrika mwaka huu imebeba kaulimbiu  “Haki za Watoto: Tulipotoka, Tulipo na Tuendako”. Siku hii huadhimishwa kila mwaka tarehe 16 Juni ikiwa ni kumbukumbu ya Maandamano ya wanafunzi katika utawala wa makaburu kitongoji cha Soweto Nchini Afrika Kusini yaliotokea tarehe 16 Juni 1976 kwa lengo la kupinga mfumo wa elimu ya kibaguzi.