Mwenyekiti Kibondo ‘aapa kula sahani moja na wapiga dili’

Posted on: February 28th, 2018

Mwenyekiti wa Halmashauri ya Wilaya ya kibondo. Mhe.Cup-kee ameapa kwamba, ‘atakula sahani moja na wapiga dili’ katika Halmashauri Wilaya ya kibondo.

 Ameyasema hayo mapema wiki hii wakati wa kikao cha dharura cha kamati ya fedha uchumi na mipango kilichoitishwa na kufanyika katika ukumbi jengo la umoja wa vijana lililopo Wilayani kibondo katika mkoa wa Kigoma.

Akisisitiza suala hilo Mhe. Cup-Kee alisisitiza  kuwa, ‘hatakubali  kuona watu wanajineemesha kwa fedha za Halmashauri wakati huohuo lawama zikielekezwa kwa wanasiasa kushindwa kuwasimamia watendaji wa Halmashauri ya Wilaya ya Kibondo’.

Kwa mujibu wa sheria za utumishi wa umma za mwaka 2004, mfanyakazi yeyote akishitakiwa kwa kosa la jinai atalazimika kusimamishwa kazi.  Hataruhusiwa kuendelea na kazi, sheria hiyo iliwahi kumng’ata  aliyekuwa mkuu  wa idara ya maji, afisa mipango na mhandisi wa ujenzi wilayani Kibondo miaka ya 2000.

Suala la kuwaadabisha wapiga dili hapa  kibondo   sio geni kwani mwaka 2017 mwanzoni, Mkurugenzi Mtendaji, Juma Mnwelle alimchukulia hatua za kinidhamu kaimu mhandisi wa ujenzi kwa sheria hiyo hatimaye alisimamishwa kazi. 

Kitaifa, baadhi ya viongozi walituhumiwa kujiingiza katika vitendo vilivyo kinyume na maadili ya utumishi wa umma ikiwemo kutuhumiwa kupiga dili akiwemo aliyekuwa  Waziri Mkuu wa Tanzania wakati wa serikali ya awamu ya nne iliyokua ikiongozwa na Dr.Jakaya Mrisho Kikwete, Ndugu Edward  Lowassa kuhusiana na  Richmond.

Suala la kujiuliza ni je mtu akishitakiwa kwa makosa ya jinai au kutuhumiwa kwa kosa la jinai anaweza kuendelea kufanya kazi kabla tuhuma dhidi yake hazijatolewa maamuzi na mahakama?