MKUU WA WILAYA YA KIBONDO AKABIDHIWA TOFALI NA WANANCHI WA KITONGOJI CHA KARUNDO

Posted on: November 7th, 2022

Mkuu wa Wilaya ya Kibondo Kanali Aggrey J. Magwaza amekabidhiwa  matofali yapatayo 45,000 na wananchi wa Kitongoji cha Karundo Kijiji cha Kichananga kata ya Rugongwe kwa ajili ya ujenzi wa Shule mpya. Wakazi wa kitongoji hiki walifyatua matofali kwa ajili ya kujenga shule ya msingi kuwapunguzi watoto wao umbali wa kwenda Shule ya Msingi Kichananga yenye umbali wa zaidi ya kilometa tatu kutoka kitongoji hicho.

Akizungumza na wananchi hao, Mheshimiwa Mkuu wa Wilaya aliwapongeza wananchi hao kwa kujitolea nguvu zao kwa kufyatua matofali kwa ajili nya ujenzi wa shule mpya,. “Ninawapongeza sana wananchi wa kitongoji cha Karundo kwa kujitoa kwenu kufyatua matofali ili mjenge shule kwa ajili ya kuwapunguzia umbali mrefu watoto wenu kwenda shule ya msingi Kichananga” alisema.

Naye mwakilishi wa Mkurugenzi Mtendaji wa Wilaya ya Kibondo Bi. Fatuma Mabira, aliwapongeza wananchi hao kwa jitihada kubwa ya kuandaa matofali hayo bila kusukumwa huku akiahidi Halmashauri itawaunga mkono kwa kuchangia mifuko kumi ya saruji pamoja na kuleta lori la kusomba mawe na matofali pindi ujenzi utakapoanza.

Kwa upande wake, Mwakilishi wa Mbunge wa Muhambwe Bi. Dorice Faida Nsekela (katibu wa mbunge) alitanabaisha kuwa katika harakati za ufyatuaji wa matofali hayo, Mhe.Mbunge wa Muhamwe Dr. Florence Samizi alitoa Tsh.100,000 katika kuunga mkono jitihada za wananchi hao ili waweze kujenga shule mpya.

Vile vile Mkuu wa Wilaya alimpongeza Mwl. Meeckboy Malagila wa Shule ya Msingi Kichananga kwa juhudi zake za kizalendo katika kuhamasisha na kusimamia ufyatuaji wa matofali hayo.