MKUU WA MKOA WA KIGOMA AAGIZA KUFANYIWA KAZI MAAGIZO YA KAMATI YA KUDUMU YA BUNGE-LAAC NA HOJA ZA CAG KWA HALMASHAURI YA WILAYA YA KIBONDO.

Posted on: June 15th, 2023

Mkuu wa Mkoa wa Kigoma Kamishina Jenerali wa Jeshi la Zimamoto na Uokoaji (Msaafu) Mhe. Thobias E. M. Andengenye, ameagiza Viongozi na Watumishi wa Halmashauri ya Wilaya ya Kibondo kutekeleza maagizo yote yaliyotolewa na Kamati ya Kudumu ya Bunge  - LAAC na Maoni ya Mkaguzi wa Hesabu za Serikali -CAG.

Ameyasema hayo katika kikao cha Baraza la Madiwani wa Halmashauri ya Wilaya ya Kibondo kilichofanyika jana (Tarehe:14/06/2023) katika ukumbi wa Halmashauri -IOM kujadili taarifa ya Ukaguzi wa CAG kwa Hesabu za Mwaka wa Fedha 2021/2022. Katika ukaguzi huo, Halmashauri ya Wilaya ya Kibondo ilipata hati safi (Unqualified) ikiwa ni miaka wa saba mfululizo.

Mhe. Mkuu wa Mkoa alitoa pongezi kwa Waheshimiwa Madiwani na Watendaji wa Halmashauri kwa kupata hati safi. Alisisitiza kuendelae kujibu hoja zilizoibuliwa na kuhakikisha hazijirudii tena. Alisema ni lazima sasa kuwa na utamaduni wa kuzuia hoja zisijitokeza.

Alisema katika kipindi hiki cha Serikali ya awamu ya sita, miradi mingi imeletewa fedha hivyo ni muhimu kuwa na usimamizi makini na kuongeza uadilifu. Rais wa Jamhuri ya Muungano wa Tanzania, Mhe. Dkt. Samia Suluhu Hassan amekuwa akileta fedha nyingi. Tunamshukru sana na tunapaswa kudhihirisha hilo kwa kuwa na matumizi sahihi ili miradi iliyokusudiwa iweze kukamilika kwa wakati na kuleta matunda kwa wananchi.

Katika kikao hicho Katibu Tawala wa Mkoa Ndg. Albert Msovela alisema hatakuwa tayari kuona watumishi anaowasimamia wakikiuka maelekelezo yaliyotolewa na Mkuu wa Mkoa na Viongozi wa Serikali kwa ujumla. Atachukua hatua mara moja kwa mtumishi atakaye sabibisha hoja na kukiuka maadili ya utumishi.

Mkuu wa Wilaya ya Kibondo Mhe. Kanali Aggrey J. Magwaza alimwahidi Mkuu wa Mkoa kuwa ataendelea kusimamia maelekezo yote. Pia alimshukuru Rais wa Jamhuri, Mhe. Dkt. Samia Suluhu Hassan kwa kuendelea kuleta fedha kwa ajili ya miradi mbalimbali ya maendeleo katika Wilaya ya Kibondo.

Mwenyekiti wa Halmashauri ya Wilaya ya Kibondo, Mhe. Habili C. Maseke alimshukru Mkuu wa Mkoa kwa kuhudhuria katika kikao hiki. Alisema yeye na Waheshimiwa Madiwani wataendelea kusimamia Halmashauri na kushirikiana na watumishi ili kuleta maendeleo zaidi. Hawatasita kuchukua hatua pale taratibu zitakapokiukwa.

Mkurugenzi wa Halmashauri ya Wilaya ya Kibondo, Ndg. Diocles M, Rutema alimwahidi Mkuu wa Mkoa na Viongozi wote kwa ujumla kuwa ataendelea kuwasimamia Watumishi wa Halmashauri. Atahakikisha taratibu zote zinafuatwa katika utekeleza wa miradi mbalimbali ya maendeleo na shughuli za kawaida zinazofanywa na watumishi. Ataendelea kusimamia nidhamu na uadilifu ili wananchi waendelee kupata huduma bora zaidi.