KIBONDO YAAHIDI KUTOA MIKOPO KWA WANAWAKE NA VIJANA

Posted on: March 17th, 2018

Kaimu Mkuu wa Wilaya ya Kibondo, Moshi Husein ameahidi kufuatilia na kuhakikisha  Halmashauri ya Wilaya ya Kibondo  inatenga na kutoa fedha kwa ajili ya kuwakopesha wanawake na vijana na matibabu bure kwa wazee kuanzia miaka 60. 

Akizungumza katika siku ya wanawake duniani iliyofanyika kiwilaya katika Kijiji na Kata ya  Nyaruoba hivi karibuni,  Ndugu Moshi Husein amesema kwamba Serikali imetoa maelekezo kwa Halmashauri kutoa mikopo kwa wanawake na Vijana ili wajikwamue kiuchumi na kuacha kujishughulisha na mambo maovu kama vitendo vya ngono na uhalifu hivyo atahikisha hilo linatekelezwa.

Aidha wazee kuanzia miaka 60 wanatakiwa kupewa matibabu bure hivyo zoezi hilo linatakiwa kufanyiwa kazi kwa haraka ili kuendana na kasi ya Serikali ya awamu ya tano.

Mwakilishi wa shirika la kuhifadhi wakimbizi duniani ‘UNHCR’ tawi la Kibondo, Dioniz Biligwa amepongeza kauli mbiu ya siku ya wanawake duniani inayosema, ‘Kuelekea uchumi wa viwanda tuimarishe usawa wa kijinsia na uwezeshwaji Wanawake Vijijini’ na kusema kauli hiyo ikitafsiriwa kwa vitendo Tanzania itakua nchi ya mfano Afrika na duniani.

Wakati huo mwakilishi wa shirika la ‘Good Neighbours’, Ruth Lawrence ameeleza kwamba kazi yao kubwa ni kufundisha wakimbizi elimu ya ujasiriamali kama biashara, ushonaji, ususi na kilimo cha kitaalam

Wanawake wametoa maombi kwa Serikali Wilayani Kibondo hususan vyombo vya dola kuingilia kati na kutokomeza vitendo vya rushwa ya ngono na ubakaji kwa wanawake na kueleza kuwa wanapinga mfumo dume unaosababisha wanawake kukosa fursa ya kumiliki Uchumi.

Mashirika mbali mbali yaliyoshiriki siku ya wanawake duniani hususan Help Age International, Good Neighbours Tanzania, Plan International yamekuwa yakihudumia wakimbizi katika kambi tatu zilizopo mkoani Kigoma ikiwemo kambi ya Mtendeli iliyopo Kakonko, Nduta iliyopo Kibondo na  Nyarugusu iliyopo Wilayani Kasulu.